1999 හෝ 2000 වර්ෂයේ පමණ ජාතික රූපවාහිනියෙන් විකාශය වුන නාට්‍යයක් තමයි නිසල විල.
ජයසේන ජයකොඩිගේ අතිශය ජනාදරයට පාත්‍ර වුණ නවකතා පෙලක එක් කතාවක් වුන "අරලියා මල් ආරාමය" නවකතාව ආශ්‍රයෙන් තමයි නිසල විල නිර්මාණය වුනේ.
චරිත
රාහුල හාමුදුරුවෝ - සුමින්ද සිරිසේන
සුමේධා (වගේ තමා මතක ) - අමා විජේසේකර
කමලාවතී - චාන්දනී සෙනෙවිරත්න
සුමේධා ගේ මව - පද්මිණී දිවිතුරගම
සුමේධාගේ මාමා - රිචර්ඩ් වීරක්කොඩි
සුමේධාගේ පෙම්වතා - රවීන්ද්‍ර යසය්
ලොකු හාමුදුරුවෝ - කේ.ඒ.මිල්ටන් පෙරේරා
නන්දාරාම හාමුදුරුවෝ - නලින් ප්‍රදීප් උඩවෙල
පංසලේ ඇබිත්තයා - හේමසිරි ලියනගේ
අරලියමල් ආරාමය කියවපු නැති අයට හා නිසල විල අමතක අයට කතාව කිවුවොත්.
අනුරාධපුරය වගේ පැත්තක ගමක තියෙන ආරණ්‍යක වාසය කරන හිමි නමක් රාහුල හිමි.ඉතාම සංසුන් ඇවතුම් පැවතුම් තියෙන හිමි නමක්.
ඒ ගමේම කඩයක් කරං ඉන්න පවුලක දුව සුමේධා (නම ඒක වගේ මතක ). සුමේධාගෙ හිත රාහුල හිමි අතරත් කඩේට බඩු අරං එන තරුණයෙක් අතරත් දෝලනය වෙනවා . රාහුල හිමි භාවනා කරන කරන තැනට ගිහින් කියවන එක සුමේධා නිතර කරන දෙයක්. රාහුල හිමි ඒ කිසිවකටත් ඇහුම්කන් දෙන්නෙ නෑ. රාහුල හිමි භාවනා කරන තැන ඉතාම නිසල විලක් තියෙනවා.
මේ අතරේ කඩේට බඩු ගේන තරුණයා අනතුරක් වෙලා මුදලාලිගෙ ගෙදර නවත්තන් වෙදකම් කරනවා. ඒ අතරේ මේ තරුණයා අතින් සුමේධා අනාත වෙනවා. සුමේධා මේසිද්දියත් විල ලඟ භාවනා කර කර ඉන්න හාමුදුරුවන්ට කියනවා. එයා කියනවා දරුවගෙ තාත්තා හමුදුරුවන් කියලා කියන බවත්. නමුත් හාමුදුරුවන් කිසි දෙයක් පවසන්නෙ නෑ.
දුවට දරුවෙක් ලැබෙන්න ඉන්න බව දැනගන්න අම්මා පහර දෙමින් අසන විට ය කියනවා රාහුල හිමි අතින් ගැබ් ගත් බව. මේත් සමග ඇති වෙන්නෙ ලොකු ප්‍රශ්නයක්. මුලු ගමම පංසල අත් හරිනවා. සුමේධාගේ චන්ඩි මාමා කෙනෙක් වන රිචර්ඩ් වීරක්කොඩි තුවක්කුවත් ගෙන ගොස් හාමුදුරුවන් ට තර්ජනය කරනවා සුමේධාව විවාහ කර ගන්නා ලෙස. ඒත් වෙඩි තබත්වාබ් කියා හාමුදුරුවන් භාවනා කරමින්ම සිටිනවා. පංසලට දානය නොලැබී යන්නේ චන්ඩි මාමාගේ තර්ජන නිසා. එහෙත් කමලාවතී (චාන්දනී ) පමණක් පංසල සමගම සිටිනවා. දවසක් පංසලට දානෙ අරං එන කමලාවති දකිනවා හාමුදුරුවන් දානෙ පිලියෙල කරනවා . මේක දැකලා දුක් වෙන කමලාවතීට හාමුදුරුවන් කියන්නෙ
" කොස් කාලෙට චීවරෙත් කොහොල්ලෑ කියනවනෙ උපාසකාම්මෙ " කියලා.
දරුවා හම්බ උනාට පස්සෙ ගෙනත් දානවා පංසලට. කමලාවතී දරුවව බාරගන්න සූදානම් වුනත් චන්ඩි මාමාගේ තර්ජන වලට බයේ නැවත දරුවව පංසලෙන්ම තියනවා. ඇබිත්තයා (හේමසිරි ) ගෙ රැවුම් ගෙරවුම් අතරෙම රාහුල හාමුදුරුවෝ දරුවට කිරි පොව පොවා හදා ගන්නවා.
සියල්ල අවසාන වෙන්නෙ සුමේධා ඇත්ත පාපොච්චාරණය කිරීමත් රාහුල හිමියන්ගේ සිල්වත් බව තව තවත් ඔප්පු වීමත් සමග.
නාට්‍යයට නිසල විල කියලා දාන්න හේතු දෙකක් තියෙන්න ඇති කියලා හිතෙනවා.
එකක් රාහුල හිමිත් නිසල විලක් වගේ, ගැඹුරුයි, කැලඹීමක් නෑ. සියල්ල නිසලව ඉවසා සිටිනවා.
අනෙක තමයි රාහුල හිමියන්ට සුමේධා පවසන සියලුම දේට නිහඬ සාක්ෂි කරු තමයි උන්වහන්සේ භාවනා කරන තැන තියෙන නිසල විල.
මෙහි සංගීතය ඉතාම ලගන්නා සුලු එකක්. මට දැනුත් ඇහෙනවා. ගයාන් ගණකාධාර විසින් තමයි සංගීතය කරලා තිබ්බේ. බටලී, වයලීන්,කල ආදිය යොදාගෙන අපූරුවට සංගීතය් නිර්මාණය කරලා තිබ්බා.
එම වර්ෂයේ සුමති සම්මාන උළලේ හොඳම නලුවා ලෙස සුමින්ද සිරිසේනත් හොඳම නිලිය ලෙස චාන්දනී සෙනෙවිරත්නත් සම්මාන ලබනවා.
- ආර්යන්-
No comments:
Post a Comment