ක්ලේහිල්/මැටි කන්ද

ක්ලේහිල් මතක කාටද?

වඩා සරල කලොත් මායාබන්ධන මතකද? අසූව අනූව දශකයෙන් මෙහා දෙදාහ දශකයෙන් එහා උපන් අයට නම් අමතක වෙන්න විදිහක් නෑ . ක්ලේහිල් කියන්නෙ මායා බන්ධන ෆස්ට් සීසන් එකේ රියානාගෙ ගම සහ මායාබන්ධකයින්ගේ බලකොටුව අයත් වුණ ප්‍රදේශය.

මයා බන්ධකයින්ගේ සමාන්තර ලෝකය රූගත කිරීම සඳහා යොදා ගන්නේ පෝලන්තයේ ප්‍රදේශ කිහිපයක්.1995 නිකුත් වුණ ෆස්ට් සීසන් එකේ රූගත කිරීම් කරන්නේ ඔස්ට්‍රේලියාවෙ සිඩ්නි වල 'බ්ලූ මවුන්ටන්' සහ පෝලන්තයේ  ප්‍රදේශ වල. පෝලන්තයේ ප්‍රදේශ වල නම් කියද්දි දිව පැටලෙන නිසා තමයි ඒවා පෝලිෂ් වලින්ම දාල තියෙන්නෙ.

Kraków-Częstochowa Upland

 
මෙන්න මේ හරියෙ තමයි ක්ලේහිල් වල සමනිං ටවර් එක තියෙන්නෙ. පෝල්ගෙ ලෝකයෙයි රියානගෙ ලෝකයෙයි දොර ඇරෙන්නෙත් මේ ප්‍රදේශයෙ. මධ්‍ය දක්ෂිණ පෝලන්තයේ තිබෙන මෙම ප්‍රදේශය ;'පෝලිෂ් ජුරාසික් හයිලෑන්ඩ්' නමිනුත් හඳුන්වනවා.ඊට හේතුව ජුරාසික යුගයේ සිට පැවත එන 220 ක් පමණ වන හුණුගල් ගුහා සංකීර්ණය නිසයි.පෝල් රියානාගෙ ලෝකයට එන්න පෙර නරඹන්න යන හුණුගල් ගුහා දර්ශණත් මෙම ගුහා වල රූගත කර තිබෙනව.මෙම ගුහා නිස මෙය සංචාරක ආකර්ශණය දිනාගත් ප්‍රදේශයක්.

Ogrodzieniec castle

 
ජුරාසික් හයිලෑන් ප්‍රදේශය් ආසන්නයේම පිහිටා තිබෙණ නටඹුන් වී ගිය මෙම බලකොටුව තමයි ගරා වැටුණු  පැරණි මායාබන්ධක බලකොටුව ලෙස යොදා ගැනෙන්නෙ.රියානව පොලොව යට ගුහාවකට දාලා ගල් දොරකින් වහනවා මතකයි නේද.මැරිච්ච මායාබන්ධකයින්ගෙ ඇට සැකිලියි පරණ ජර්නල් ටිකකුයි හම්බ වෙන්නෙ ඒ බලකොටුවෙන්.
මුල් වතාවට 14-15 සියවස් වල ඉදි වුණ මෙම බලකොටුව පසුකාලීනව විවිධ අවස්ථාවන් වල ප්‍රතිසංස්කරණයන්ට ලක්වෙලා තිබෙණවා. Włodkowie Sulimczycy පවුල විසින් බලකොටුව ඉදිකොට තිබෙණවා.මෙම මාළිගයත් සංචාරකයන්ගේ නොමද අකර්ශණය දිනාගත් තැනක්.

zawiercie
මෙම ප්‍රදේශයේ ගම්මානයක තමයි රියනාගෙ ගම වන ක්ලේහිල් සහ පිටුවහල් කරන්නන්ගේ මුඩු බිම් ප්‍රදේශ රූගත කරලා තියෙන්නෙ.

Czocha Castle

මේක තමයි තැන. රාජ්‍යාධිකාරීන් (මර්නා,ලූකස්, කොරියොන් ) සහ මායාබන්ධකයින් ගේ නිවස්නය වුණ, පියාඹන නැවු ලෑන්ඩ් කරල තිබුණ,භූගත බලාගාරයක් තිබුණ මායා බන්ධකයන්ගෙ බලකොටුව ලෙස යොදාගත්තෙ මෙම බලකොටුවයි. පෝලන්තයේ 'හොග්වාර්ට්ස්' ලෙස මෙම බලකොටුව හඳුන්වන්නේ හොග්වාර්ට්ස් මැජික් පාසලේ පෙනුම තිබෙණ නිසයි.
13 වන සියවසේදී මෙම මාළිගය ඉදිකරන්නට යෙදුනෙ බොහිමියානු (චෙච් රාජ්‍යය ) රජෙක් වුණ එකැස් වෙන්සෙස්ලාඋස් 1 විසිනි.පසුව එය Konrad von Wallhausen ට හා මේසන් හි බිෂොප් වරයාට උරුම වෙනවා.ඉනුත් පසු රජවරු රැජිණියන් කිහිප දෙනෙකුට උරුම වුණ මෙම මාළිගය 1793 අගෝස්තු 17 දින ගින්නකට හසු වෙනවා.පසුව අත්හැර දමා තිබුණු එය 1909 දී සුරුට්ටු නිෂ්ප්පාදකයෙක් වුණ අර්නස්ට් ගස්ටෆ් විසින් මිලදීගෙන ප්‍රතිසංස්කරණය කරන්නේ ජර්මානු ගෘහ නිර්මාණ ලක්ෂණත් ඇතුළත් කරමින්.දෙවන ලෝක යුද්ධ සමයේ හමුදාවන් සහ සොරුන්ගේ ආක්‍රමණයන්ට නතු වුණ මාළිගය 1940 අග සිට 1950 තෙක් සරණාගත නිවාසයක් ලෙස භාවිතා කෙරුණා.1952 දී එය පෝලන්ත හමුදාව අත්පත් කර ගෙන නිවාඩු ගතකිරීම සඳහා හමුදා නවාතැන්පලක්  ලෙස යොදා ගැනීමත් සමග නිල සිතියම් වලින් ඉවත් කරනු ලබනවා. 1996 දී එය මහ ජනයාට විවෘත වන්නේ හෝටලයක් සහ සම්මන්ත්‍රණ ශාලවක් ලෙසයි. මේ වන විට බහුල වශයෙන් එයට සංචාරකයන් ඇදෙන්නෙ යුරෝපීය මාළිගාවක අසිරිය විඳිමින් නවාතැන් ගෙන විවේක ගන්නයි.

Książ Castle

 
මායා බන්ධකයින්ගේ මාළිගයේ ඇතැම් අභ්‍යන්තර දර්ශණ (උසාවිය වැනි ) සඳහා මෙම මාළිගයේ අභ්‍යන්තරය යොදාගෙන තිබෙණවා.

මෙම සියළුම ස්ථාන අද වන විට යුරෝපා සංචාරකයින් අතර ජනප්‍රිය ස්ථාන වන අතර ඒවා ජනප්‍රිය වීම සඳහා ස්පෙල්බයින්ඩර් කතා මාලාවෙන් ලැබෙන්නෙ නොමද උදවුවක්.

- අමිල ලක්මාල් -

භාරතයේ විත්ති - 44 - "මහරාජාගේ නිධානය"

රජුන්ගේ බිම යන්නෙන් ජනිත වුණ, භූමි ප්‍රමාණයෙන් ඉන්දියාවෙ විශාලම ප්‍රාන්තය වන 'රාජස්තාන්' යනු බහුලව වියලි සහ කන්තාර දේශගුණයෙන් යුත් සශ්‍රීකත්වයෙන් අඩු ප්‍රාන්තයක් වුවත් අතීතයෙ එහි විසූ රජා මහාරජා වරුන් නම් සශ්‍රීකව විසූ බවට එහි පිහිට ඇති , අදටත් ඉතිරිව තිබෙන සිය ගණන් වූ 'මැහැල්' (මළිගා ) සහ 'හවේලී' (ප්‍රභූ නිවාස/වළව්  ) සාක්ෂි දරණවා.මා එය ඇසින් දුටු සාක්ෂි කරුවෙක්මි. මේ එක් එක් මාළිගාවන් හා හවේලී සමග බැඳුණු කතාන්දර රාශියක් තිබෙණව. ඉන් එක් ප්‍රසිද්ධ කතාවක් / ජනප්‍රවාදයක් තමයි ජය්ගඩ් බලකොටුවේ නිධානය සම්බන්ධ කතාව.ජය්ගඩ් බලකොටුව සහ ඒ හා සම්බන්ධ ජ්ය්පූර් මහ මාළිගය, ආමෙර් මහා මාළිගය,නහර්ඝඩ් බලකොටුව වැනි ස්ථාන ගැන මගේ මීට පෙර ලිපි වලින් කිය වුන නිසා ආයෙ අමුතුවෙන් ඒ ගැන කියන්නෙ නැතිව කලින් පෝස්ට් වල ලිංක් දානවා.කැමති කෙනෙක් බලන්න.නැත්තම් මේ ගෲප් එකේම මගෙ පෝස්ට් තියෙන යුනිට් එකෙනුත් ඒවා හොයා ගන්නා පුළුවන් වෙයි.
ඉන්දියාවබලා ...05 "රජුන්ගේ බිම වෙත"

https://thearchive123.blogspot.com/2018/08/05.html

ඉන්දියාවබලා ...06 - 'රජුන්ගේ බිමේදී'

https://thearchive123.blogspot.com/2018/08/06.html 

ඉන්දියාවබලා ...07 - 'ආමේර්'

https://thearchive123.blogspot.com/2018/08/07.html

ඉන්දියාවබලා... 08...- " චිත්තෝර්ඝඩ්"

https://thearchive123.blogspot.com/2018/08/08.html

ආමේර් ;කච්චාවාහ රජ පරම්පරාවේ (පසුව ජය්පූර් වෙත සේන්දු වුණ ) එක් ප්‍රසිද්ධ මහාරාජා වරයෙක් තමයි 'මහරාජා මාන්සිං 1'(1590-1614) කියන්නේ.

මෙතුමා ජෝදාභායි දේවියගේ ඥාති බෑණනුවෙක් වුණ නිසා මහා අක්බර් අධිරජ්‍යයාගේ විශ්වාසවන්තයෙක් වුණ අතරම එතුමාගෙ සේනාධිනයකයෙක් වුණ. මහා අක්බර් අධිරාජ්‍යයා මාන්සිං 1 පිටත් කර හරිනවා (1580 දී මහරාජ බවට පත්වීමට පෙර, ඇෆ්ගන් වරුන් මර්ධනය කිරීමට. ඇෆ්ගන් වරුන් සාර්ථකව මර්ධනය කිරීමට මෙතුමා සමත් වෙනවා.ඔහු නැවත ආමේර් වෙත පැමිණෙන්නේ ඇෆ්ගන් වරුන්ගෙන් කොල්ලකාගත් විශාල ධනස්කන්ධයක්ද අරගෙනයි. මහා අක්බර් අධිරාජ්‍යයාගේ කොතරම් හිතවතෙක් වුවත් ධනයට ලෝභ බව ඕනම කෙනෙකුගේ ලක්ෂණයක් බව ප්‍රකට කරමින් මෙතුමා එම ධනයෙන් විශාල ප්‍රමාණයක්   ජය්ඝඩ් බලාකොටුවේ යම් තැනක සඟවා තබනවා. මෙම ස්ථානය ගැන විවිධ අදහස් තිබෙනවා.ඇතැමුන් පවසන ආකාරයට ඒ ජය්ඝඩ් බලකොටුවට,වැසි සමයේදී අරාවල්ලි කඳුවැටි වලින් ගලා එන ජලය එක් රැස් කිරීමට යොදා ගන්නා ජල තටාකය යටින් පිහිටි රහස් කුටියකයි. (අදටත් මෙම ජල ටැංකියට යාමට තිබෙන දොරවල් අගුළු ලා වසා තිබෙනවා ).

තවත් අයට අනුව ඒ කොටු පවුරේ යම් ස්ථනයක වන අතර තවත් අයට අනුව ඒ ආමේර් මාළිගයේ සිට හෝ නහර්ඝඩ් බලකොටුවේ සිට ජය්ඝඩ් බලකොටුවට ගමන් ගන්නා රහස් උමං මාර්ග වලින් එකකයි.

(මෙම උමං මාර්ග වලින් කිහිපයක් අදටත් යහතින් තිබුණද ඒවායේ ගමන් කල හැක්කේ කෙටි දුරක් වන තෙක් පමණයි.ඉතිරිය දෙපසින්ම වසා දමා තිබෙණව.මීට අමතරව වැසී ගිය සොයා නොගත් උමං මාර්ගද මාළිගාවන් හා බලකොටු වල සැළසුම් වලට අනුව පවතිනවා ). කෙසේ හෝ මහරාජා මාන්සිංගේ නිධානය මෙසේ වැසී යනව. මීට පසුවද විවිධ අවස්ථාවන් හි අමේර් සහ ජය්පූර් රජ පවුළේ උදවිය ජ්ය්ඝඩ් බලකොටුවේ ආරක්ෂාව උදෙසා සැඟවී සිටි අවස්ථාවන් වල ඔවුන්ගේ ධන සම්පත් මෙහි සඟවා තබා තිබෙන අතර නැවත මාළිගයට ප්‍රහාර ඇති වුවහොත් ඒවා නැති වේ යැයි යන බිය නිසා ඒවා ජය්ඝඩ් බලකොටුවේම තිබෙන්නට හැර තිබෙණවා. එම නිධානයන්ද කොතැන කෙසේ පවතිනවාහ යන්න නොදනී. මෙම නිධාන වලින් එකක් වන්නේ ,රාජධානිය ආමේර් සිට ජය්පූර් වෙත ගෙන ආ විශිෂ්ඨ රජෙක් වන සහ ඉංජිනේරු දැනුමෙන්ද යුත් වූ මහාරාජා සවායි ජය්සිං 2 විසින් සඟවන්නට යෙදුනායැයි කියන නිධානයකි.

(රජ පරපුරට සවායි නම ලැබෙන්නෙ මෙතුමාගේ සිටයි.ඊට හේතු වුණා යැයි කියන කතාව වනුයේ මොහු සේවය කල ඖරන්ග්සෙබ් අධිරාජ්‍යයා බැහැ දැකීමට යන අතරතුර කාන්තවක් ඇසුරු කිරීමට ප්‍රමාද වූයෙන් රාජ සභාවට යාම ප්‍රමාද වූ බවත්.අතිෂය කෲර ඖරන්ග්සෙබ් අධිරාජ්‍යයා රැවටීමට බොරු වර්ණනාවක් ගෙතූ මහරාජා ජය්සිං ඔබ තුමා පූර්ණ චන්ද්‍රයෙක් නොව චන්ද්‍රයෙකුත් තවත් කාලක් බව ප්‍රකාශ කලේය. කාල යන්නට හින්දියෙන් යෙදෙන වචනය 'සවා' යන්නයි. එතැන් සිට ජය්පූර් මහ රාජා වරුන්ගේ නම මුලට සවායි යන්න එකතු වන්නෙ ඖරන්ග්සෙබ්ගෙත් ආශිර්වාදය සමග බව කියවෙනවා).
කෙසේ හෝ පසු කාලීනව ජය්පූර් මහරාජා වරයෙක් වුණ කීර්තිමත් මහරාජා මාන්සිං 2 මියගිය පසු ඔහුගේ බිරිඳ මහරාණි ගයාත්‍රි දේවි හදිසි නීතිය ප්‍රකාශ කිරීමෙන් පසුව (1975) අතඩංගුවට ගැනීමට ඉන්දිරා ගාන්ධි කටයුතු කරනවා.
                                 (Maharani Gayatridevi )

මෙය හුදෙක් දේශපාලනමය පලිගැනීමක් බව ඉතිහාසගත වන්නෙ ගයාත්‍රීදේවි කොංග්‍රස් රජය ප්‍රතික්ෂේප කල තැනැත්තියක් වූ බැවිණි. ගයාත්‍රිදේවී සිරගතව සිටියදී ඉන්දිරා ගාන්ධි විසින් ඉන්දීය හමුදා ඛණ්ඩ රැසක් ජය්ඝඩ් බලකොටුව වෙත යවන්නෙ නිධන් හරා අවුස්සා බැලීමටයි.ඒ වන විටත් රාජස්තානයෙ අන් සියළුම බලකොටු හා මාළිගා ඉන්දීය පුරවිද්‍යා අධිකාරිය යටතේ පැවතුණත් ජය්පූර් මාළිගය සහ කුමක් හෝ හේතුවක් මත ජය්ඝඩ් බලකොටුවත් රජ පවුළටම අයත්ව තිබුණා.එය සංචාරකයන්ට විවෘත වුණේ නෑ(අදටත් ජය්පූර් මහ මාළිගයේ කොටසක් ;චන්ද්‍ර මැහැල් නමින් හඳුන්වන , රජ පවුළට අයත් වන අතර ජය්ඝඩ් බලකොටුවේ ආදායමෙන් කොටසක් රජ පවුළ වෙනුවෙන් වෙන්වී ඇත ).මාස තුනක් තිස්සේ ජය්ඝඩ් බලකොටුවේ වැවු පොකුණු හිස් කරමින් නිධන් සෙවූවද ඉන්දිරා රජයට සොයාගත හැකි වූවක් නෑ.  තවත් සමහරුන් කියන ආකාරයට සොයාගත් දේ රජයට නොව ඉන්දිරාගාන්ධි සිය පුද්ගලික ප්‍රයෝජනයට ගත් බව පැවසෙනවා. කෙසේ හෝ මාස තුනක ට්‍රෙෂර් හන්ට් එක ඉවර වුණාට පස්සෙ ජය්පූර් දිල්ලි මහා මාර්ගය දින තුනක් මහ ජනයාට වසා තබන්නෙ ජ්ය්ඝඩ් කොටුවේ සිටි හමුදාව ඉවත්කර ගැනීම සහ ඔවුන්ගේ වාහන රැගෙන යාමටයි (මෙසේ වසා තැබූ කාලයේ නිධන් ද හොරෙන් පැන්නූ බව කටකතාවකි ).

සත්‍ය අසත්‍ය කෙසේ වුවද අදටත් ජය්ඝඩ් , නහර්ඝඩ් බලකොටු හා ආමේර් සහ ජය්පූර් මළිගය යන සිවු කොණ් වලින් වටවූ ප්‍රදේශ වලින් කොතැනක හෝ මෙම නිධානය සඟවා ඇති බව ජනයා විශ්වාස කරති. ඔබ අමේර් හෝ ජය්ඝඩ් වෙත සංචාරය කලහොත් සහ ගයිඩ් වරයෙක් සමග ගියහොත් ඔවුන් යම් යම් ස්ථාන දක්වා කැට තියා ඔබට පෙන්වාවි මෙතැන තමයි නිධානය සඟවා තිබෙණ්ණෙ කියාලා. ඒත් එ හුදෙක් ඔවුන්ගේ මතයක් පමණි.

ප.ලි. මේ වෙනකොට ජය්පූර් රජ පවුළේ උරුමකරු වන නාමික මහරාජා සවායි පද්මනාබ් සිං වෙනවා.

නැවත හමු වෙමු.

- අමිල ලක්මාල් -


නැවත හමුවෙමු

Gallery

Jaigrh fotress,mer Palace and Arawaalli maontains

'හංගුක් දේශයේ කතා' - 01 - "කොරියානු අධිරාජ්‍යයාගේ බිරින්දෑවරු...."

මේ ලිපිය ලියන්න හිතුණෙ මගෙ ෆේස්බුක් මිතුරියක් වන ජනනි සේනාධීර විසින් ලියන්නට යෙදුන නවකතාවක් නිසා.මට හිතෙන විදිහට සහ පෙනෙන විදිහට මේ ලිපියෙ ඒ කතාවත් එක්ක යම් සම්බන්ධතාවයක් ඇති. ඒ ගැන හරියටම කියන්න අමාරුයි මොකද තාම නව කතාව එලියට ඇවිත් නැති නිසා.

කොරියානු අධිරාජ්‍යයාගේ බිරින්දෑවරු....

ලංකාවේ ඉන්දියාවේ සහ බොහොමයක් රටවල වගේම කොරියානු අධිරාජ්‍යයන්ටත් විශාල අන්තඃපුරයක් තිබිලා තියෙනවා.කොරියාවෙ අවසාන රාජ වංශ තුන වුණ (Silla) සිල්ලා,(Goryeo)ගොරෙයො සහ (Josen)යෝසන් රාජ වංශයන් වෙද්දි මේ අන්තඃපුරයන් මනාව සංවිධානය වෙලා හුදෙක් රජුගේ බිසෝවරුන් වෙනුවට යම් නිලයක් දරන්නියන් තත්ත්වයට පත් වෙලා තිබුණා.උනන්දුවක් ඇති අයට දැන ගන්න මේ ඒ ගැන මම දන්න ටිකක්.

ලංකාවේ දැනට අවුරුදු කිහිපයකට කලින් විකාශනය වුණ ඓතිහාසික කොරියානු නාට්‍ය නරඹා ඇති අයට යම් වැටහීමක් ඇති මේ ගැන.

රජ්‍යයේ නීතිය අනුව රජමැදුරේ වාසය කරන ලොකු කුඩා බේදයකින් තොරව සියළුම කාන්තාවන්ගේ අයිතිය අධිරාජ්‍යයා සතු වුණා.ඒ නිසා රජ මැදුරේ සේවිකාවන්ට පවා විවාහය තහනම්. විවාහයක් ගැන සිතීම හෝ පිරිමියෙක් සමග සම්බන්ධතාවයක් තබා ගැනීම මරණීය දණ්ඩණය ලැබෙණ අපරාධයක් වුණා.
සේවිකාවන් හැඳින්වූවේ 'සන්ග්යොං'(Sanggun)  (ඉහල පාලිකාවන්) සහ 'සංග්-උයි'(sangeui)(පහල පාලිකාවන් ) ලෙස.

       (Sanggun in dark green unirom.... Sangeui in light green uniform)

සන්ග්යොං පාලිකාවන් 'සන්ග්යොං මාමන්‍යිම්' යන නමින් ඇමතීමට යෙදුනා. මොවුන් මනාව සංවිධානය වුණ රජ මාළිගාවේ විවිධ දෙපාර්තමේන්තු හා අංශයන් හි උසස් තනතුරු හෙබවූ අයයි.මෙම දෙපාර්තමේන්තු සහ අංශ ගැන වෙනම ලිපියකින් කතා කිරීමට බළාපොරොත්තු වෙනවා.මෙම සන්ග්යොං වරියන් අතරත් ශ්‍රේණි තිබුණා. උදාහරණ විදිහට රජුගේ මාළිගයේ පාලිකාව මවු රැජිණගේ පාලිකාවට ඉහල ශ්‍රේණියක් දැරුවා.මවු රැජිණගේ පාලිකාව මහ බිසවගේ පාලිකාවට වඩා ඉහල ශ්‍රේණියක් දැරුවා.මහ බිසවගේ පාලිකාව උප බිසෝවරුන්ගේ, කුමාර වරු සහ කුමාරියන්ගේ පාලිකාවන්ට වඩා ඉහල ශ්‍රේණියක් දැරුවා.  එසේ ඔවුන් අතරත් විවිධ බෙහීම් තිබුණා.  නාට්‍යය නරඹා ඇති අයට මේ ගැන තරමක් වැටහීමක් ඇති. එහි සුප්‍රකට 'හන්' , 'චූයි', 'යුන්' වැනි පාලිකාවන් 'සන්ග්යොං' ශ්‍රෙණියට අයත් වුණ මුළුතැන්ගේ දෙපාර්තමේන්තුවේ ඉහල පාලිකාවන්.'සං-උයි' පාලිකාවන් ' සන්යොං' වරියන් අතින් පාලනය වුණා.

රජුගේ බිරින්දෑවරුන් බවට පත්වීමේ හැකියාව , රජුගේ වරණය අනුව මේ 'සන්ග්යොං'  සහ 'සං-උයි'වරියන්ට තිබුණා.Dae Jang-Geum හි 'යොන්-සෙන්' මුළුතැන්ගේ සේවිකාවක්ව සිටියදී  හෝ Dong-Yi හි දොං-යී  හෝ දොං-යී හි ඔක්-ජං රජුගේ බිරිඳක් වන්නේ එසේයි.ඔවුන් තිදෙනාම මුළින් ඇතුළත් වූයේ මෙම ශ්‍රේණියටයි.

'සන්ග්යොං' වරියන්ට ඉහල ශ්‍රේණියෙන් රජුගේ බිරින්දෑවරියන් ආරම්භ වෙනවා.

04. "වොං ශ්‍රේණිය/හතර වන ශ්‍රේණිය"
රජුගේ බිරින්දෑවරුන්ගේ පහලම ශ්‍රේණියයි.මෙය නැවත කොටස් දෙකකට බෙදුණා.ඒ 'සුවොං' සහ 'සොවොං' ලෙසයි.

'සුවොං'(Sukwon) යනු රජුගේ බිරින්දෑවරියන්ගේ පහලම ශ්‍රේණියයි. මොවුන් හුදෙක් අන්තඃපුර කාන්තාවන් ලෙස සැළකුණ අතර රජ පවුලට අයත් වුණේ නෑ. Dong-Yi හි දොං-යී මුලින්ම සහ එහි 'ඔක්-ජං' ප්‍රතිශ්ඨාපනයෙන් පසුව ඇතුළත් වන්නේ මෙම ශ්‍රේණියටයි. මෙම ශ්‍රේණියේ අන්තඃපුර කතුන් ගැබ් ගැනීමකින් හෝ වෙනත් විශේෂ කාරණයක් මත රජුගේ හෝ අභ්‍යන්තර මණ්ඩලයේ (මාළිගයේ පරිපාලන කටයුතු භාර වුණ දෙපාර්තමේන්තුව ) ප්‍රධානියා ලෙස මහ රැජිණගේ නියෝගයක් මත 'සෝවොං'(Sowon) හෝ ඊට ඉහල ශ්‍රේණියකට උසස් කිරීම මගින් රජ පවුළට ඇතුළත් කරගත හැකියි.

03."යොං  ශ්‍රේණිය/තුන්වන ශ්‍රේණිය"

මෙම ශ්‍රේණියෙන් ඉහල බිරින්දෑවරියන් රජ පවුළට අයත් වුණා .මෙයද නැවතත් කොටස් දෙකකට බෙදුණා.ඒ 'සුයොං'(Sukyong) සහ 'සොයොං' (Soyong)ලෙසයි. Dae Jang-Geum හි යොන්සෙන් බිසවට දරුවෙක් ලැබීමත් සමග 'සොවොං' ශ්‍රේණියට උසස් කිරීම මගින් රජ පවුළට ඇතුළත් කරගත්තා එය නැරඹූ අයට මතක ඇති.     

02."උයි ශ්‍රේණිය/දෙවන ශ්‍රේණිය"

මෙම ශ්‍රේණිය නැවතත් උප ශ්‍රේණි දෙකකට බෙදුණා. ඒ 'සු-උයි'(Sukeui) සහ 'සොඋයි'(Soeui)ලෙසයි.මෙම උයි ශ්‍රේණියෙන් ඉහල බිසෝවරුන් ට පොදුවේ 'බින්'(Bin) යන ගෞරව නාමය භාවිතා වුණා. දොං-යී හි ඇයට කුමාරයෙක් ලැබීමෙන් පසුව පහලම ශ්‍රේණියේ සිට 'සු-උයි' ශ්‍රේණිය තෙක් උසස් කිරීමෙන් පසුව සහ  දොං-යි හි 'ඔක්-ජං' බිසව කුමාරයෙක් ලැබීමෙන් පසුව 'සු -උයි' ශ්‍රේණිය තෙක් උසස් කිරීමෙන් පසුව ඔවුන් පිළිවෙලින් 'සු-බින්'/'චොයි සු-බින්' සහ 'සු-බින්'/ජං-හුඉ බින්' යන නම් වලින් හැඳින්වුණා.

01.b. "ග්විං ශ්‍රේණිය/පළවන ශ්‍රේණියේ උප ශ්‍රේණිය"

රජුගේ ප්‍රධාන උප බිසවගේ ශ්‍රේණිය මෙය වේ. රජු ප්‍රසිධ සභාවන් හී අසුන් ගන්නා විට රජුගේ වම්පසින් දෙවනියට වාඩි වීමට මෙම බිසවට හැකිවේ.

01.a. "බින් ශ්‍රේණිය"
මෙය බිසෝවරුන්ගේ ඉහලම ශ්‍රේණිය වන අතර අගබිසව එම ශ්‍රේණියට අයත් වේ. රජු ප්‍රසිද්ධ සභාවන් හි වාඩි වන විට වම් පසින් පළමුවෙන් වාඩි වන්නේ මැයයි (මවු බිසව දකුණු පසින් වාඩි වේ ).රජුගෙන් පසු මවු බිසවට පමණක් දෙවැනි වන බලයක් මෙම බිසවට හිමි වේ.රජ මාළිගයේ සියළුම අභ්‍යන්තර පරිපාලන දෙපාර්තමේන්තු සහ අංශ වල ප්‍රධානියා ඇයයි. පොදුවෙ 'උයි' ශ්‍රේණියෙන් ඉහල බිසෝවරු 'බින්' ගෞරව නාමයෙන් හැඳින්වීමට යෙදුනට අග බිසවට පමණක් යෙදිය හැකි ගෞරව නාමය වූයේ 'ජුංජං'(Jungjeon ) යන්නයි.
දොං-යි හි යහපත් බිසවක් වූ 'ඉන්හියොන්' බිසව සහ ඇයව බලයෙන් පහ කිරීමෙන් පසුව 'ඔක්-ජං' බිසව ද මෙම ශ්‍රේණියට අයත් වුණා.
මෙම බිසෝවරුන් වෙන් වෙන් කර හඳුනාගත හැකි වන එස ඔවුන්ගේ ආභරණ හා ඇඳුම් පැළඳුම්ද වෙනස් වුණා. අගබිසව සහ මවු බිසවට පමණක් මකරෙක් ගේ රුව රැගත් කොන්ඩ කටුවක් පැළඳිය හැකි වුන අතර ඉන් පහල සියළුම බිසෝවරුන් ෆීනික්ස් කුරුල්ලාගේ රුව ගත් කොන්ඩ කටුවක් පැළඳිය යුතු වුණා.

    (මකරෙක් ගේ රුව රැගත් කොන්ඩ කටුව)

ෆීනික්ස් කුරුල්ලාගේ රුව ගත් කොන්ඩ කටුව

 

එමෙන්ම මවු බිසව සහ අග බිසවගේ 'ජොගොරි'(Jeogori)(කොරියානු සාම්ප්‍රදායික ඇඳුමේ උඩ කොටස ) හි පපුවේ සහ දෙඋරහිසෙහි රජුගේ ලාංඡණය මසා තිබුණත් අන් බිසෝවරුන්ගේ එසේ වූයෙ නෑ.

 ( Queen/Jungjeongs' with emperors' emblem in their jeogories)

කොරියානු රාජ වංශ වල රජ බිසෝවරු යනු හුදෙක් රජුගේ දුක සැප බෙදා ගනු වස් බිරිඳක් ලෙසින් ජීවත් වුණු අය නොව යම් කිසි තනතුරක් දැරූ , පාලන තන්ත්‍රයේ කොටසක් බව සරල අවබෝධයක් ඔබට ලැබෙන්න ඇති යැයි සිතමි.
ඉදිරියට තව තව දේ 'හංගුක් දේශයේ කතා' වලින් බළාපොරොත්තු වන්න.

- අමිල -

"මාධොරුභාගන්"

විශ්වයේ සෑම දෙයක්ම සෑදී ඇත්තේ අන්ත දෙකක එක්වීමෙනි...ගණකාධිකාරි වරයෙක් වන මා හට එය ගණකාධිකාරිණයේ ඉගැන්වෙන 'ද්විත්වරූප සංකල්පය' ලෙසද දැක්විය හැක.ද්විත්වරූප සංකල්පය ගණකාධිකරණයේදී හුදෙක් මුදලින් මැනිය හැකි ගණුදෙනු හා සිද්ධීන් සම්බන්ධයෙන් පමණක් වූවද එය විශ්ව සාධාරණ රීතියකි...සෑම දෙයකකටම එය අදාල වන බැව් මගේ හැගීමයි.. අෂ්ඨලෝක ධර්ම චක්‍රයේ කියවෙන ලාභ අලාභ,යස අයස, නින්දා ප්‍රශංසා, සුඛ දුක ද එවැන්නක්මය...
පුරුෂයන් හා කාන්තාවන් ගත් කල මොවුන් තුළද දෙදෙනාගේම ලක්ෂණ ගැබ් වෙන බව ජීවවිද්‍යාත්මක කාරණයකි . මේ පුද්ගල දෙකොට්ඨාසය තුළම ටෙස්ටොස්ටෙරෝන් (පුරුෂ හෝමෝන) සහ ඊස්ට්‍රජන් (ගැහැණු හෝමෝන ) යම් ප්‍රමාණයකින් අන්තර්ගත වේ. එය අඩු වැඩි වීම මත ස්ත්‍රී පුරුෂ භාවය තීරණය වේ.
එමෙන්ම මනෝවිද්‍යාත්මකව ගතහොත් පුරුෂයන් තුළ ස්ත්‍රී සිතුම්පැතුම් හෝ අදහස් ද ස්ත්‍රීන් තුළ පුරුෂ සිතුම් පැතුම් හෝ අදහස් ද යම් ප්‍රමාණයකින් පවතී.
මෙම හෝමෝන සමානව පවතින එක් ලිංගයකට ලඝු කල නොහැකි සාමාන්‍ය ජන කොට්ඨාශයක්ද ජීවත් වේ..
ලාංකීය සමාජයේ 'පිරිමි භාග' හෝ 'ගෑණු භාග' කියලා කියන්නෙ මේ වන් මධ්‍යම ස්ථානයක් හිමි කරගෙන උපන් පුද්ගලයන් අපහාසයට හෝ උපහාසයට ලක් කිරීමට යොදා ගන්නා පදයකි.එය ඉන්දියාව තුළද වේ.
එසේ වුවද 'අර්ධනාරීශ්වරන්' යනු කිසිසේත් එවන්නක් නොවන පූජනීය සංකල්පයකි. ඉහතින් ද පැවසූ පරිදි විශ්වයේ තිබෙන අන්ත දෙකක එක්වීම මගින් සියල්ල නිර්මාණය වීමේ සංකල්පය හින්දු දහමේ නිරූපණය කෙරෙන්නේ 'අර්ධනාරීශ්වරන්' ගෙනි. මෙය හින්දු දහමේ මහ දෙවියා වන 'ශිව' ගේ දකුණු අර්ධයත් , ඔහුගේ අර්ධාංගණිය වන 'පාර්වතියගේ' වම් අර්ධයත් එක් රුවකට ගෙන නිර්මාණය වූ දේව රුවකි.

ඉන්දියාව තුළ සුප්‍රකටම අර්ධනාරීශ්වර කෝවිල පිහිටන්නේ තමිල්නාඩු ප්‍රාන්තයේ 'තිරුචන්ගොඩේ' හි ය. මේ කියන තිරුචන්ගොඩේ හි සිදු වන සිද්ධියක් පාදක කරගෙන, පෙරුමාල් මුරුගන් අතින් ලියවුණ දැඩි මතභේදයකට තුඩු දුන් නවකතාවකි 'මාධොරුභාගන්'. සැකෙවින් කතාව දරුඵල නැති , දොලොස් වසරක විවාහක දිවියක් ගෙවූ යුවලක් සමාජය ඉදිරියේ පත්වන අපහසුතාවන් හා ඉන් මිදීමට ගන්නා තොරක් නැති උත්සාහයන් ගැනය. අන් මිනිසුන්ගේම කුණු සොයමින් ඔවුන් අපහසුතාවයට පත් කරමින් විහිලුව නම් රෙදිකඩකින් වසා ගදගහන සත්‍ය එලි කොට තව කෙනෙක් තලා පෙලා දැමීමට බලා සිටින මිනිසුන් වෙසෙන ඉන්දියාව මතු නොව ලංකාවේද මෙවන් යුවලකට විදින්න සිද්ධ වන අපහසුතා එමටය.ලංකාවය වඩා ඉන්දියාවේ එය තරමක් වැඩිය. ග්‍රාමීය ප්‍රදේශ වල බෙහෙවින් වැඩිය. එවන් තත්ත්වයකදී විවාහ වී වසර දොලහක් දරු ඵල නොමැති වීම යනු ජීවත් වනවාට වඩා මිය යාම යෙහෙකැයි සිතෙන කාරණාවකි.
මාධොරුභාගන් කෘතියේ මෙම සිද්ධීන් ඉතාම සානුකම්පිතව ලියා ඇත.
මාධොරුභාගන් මෙම වසරේ අප අතට එන්නේ එහි ඉංග්‍රීසි පරිවර්තනය වන 'One Part woman' කෘතිය කුෂාන් ද සිල්වා අතින් සිංහලට පරිවර්තනය වී 'අර්ධනාරී ' ලෙසය.
පරිවර්තන ක්ෂේත්‍රයේ ප්‍රවීණයෙක් නොවන නිසාදෝ එසේ නැතිනම් ප්‍රවීණකම් බලෙන් ගා ගැනීමට හෝ එසේ ගෑවීමට තරම් වටේ බිහිවුණ පාඨක පිරිසක් නැති කම නිසාදෝ මන්දා කුෂාන් විසින් සිංහල භාෂාවේ 'මහප්පරාන' හිස මත තබා නොගෙන සිය කෘතිය ඉතාම ලිහිල්, සරල, සුන්දර භාෂාවකින් පරිවර්තනය කර තිබෙනවා. එබැවින් අපහසුවකින් තොරවගලාගෙන යන කතාවක් අපහසුවකින් තොරව කියවා විදීමේ ඉඩකඩ අපට ලැබිලා තියෙනවා.

කතාවට තමිල්නාඩු ප්‍රාන්තයේ තිරුචන්ගොඩේ පාදක වුවත් කියවන විට මගේ සිතට දැනී ගියේ කේරල ප්‍රාන්තය පදනම් වූ : නිවින් පෝලි, සායි පල්ලවී,මෝහන් ලාල් වැන්නවුන් රංගනයෙහි යෙදෙන මලයාලම් සිනමාකෘතියක් නරඹන විට දැනෙන සුන්දර හැගීමකි.
මාධොරුභාගන් එසේ නැතහොත් අම්මය් අය්යප්පන් යනු අර්ධනාරීශ්වර හැදින්වීමට යෙදෙන තවත් නම්ය .
කතාවෙහි අර්ධනාරීශ්වර දෙවියන්ට වැදගත් ස්ථානයක් දී ඇති බැවින් එම නාමය දී ඇති බව සිතිය හැක.
එහෙත් සිංහල පරිවර්තනය ගත් කල එයට දී ඇති අර්ධනාරි නාමය ගත් විට මට තවත් අදහසක් සිතේ.එය හුදෙක් මගේ අදහසක් පමණක් බැවින් පෙරුමාල් මුරුගන්ට එල්ලවුණා සේ මා වෙත දෝෂාරෝපණ එල්ල කිරීම නොමනාය.
ඒ අදහස නම් ඉහතින්ද මා කියූ පිරිමි භාග හෝ ගෑණු භාග කතාන්දරයයි. සමාජයේ පිලිගැනීම වණුයේ පිරිමිභාග/ගැහැණු භාග වලට දරුවන් සැදීමේ/ වැදීමේ හැකියාවක් නොවන බවයි. එහි ජීව විද්‍යාත්මක තත්ත්වය මා නොදනිමි.
ඒ හුදෙක් මගේ අදහසක් පමණි.
කතාවේ වැදගත්ම දෙයක් වනුයේ අන්ධභක්තිය ගැන කෙරෙන හෙලිදරවුවයි. නීච කුලයේ අය ඇල්ලීමම පාපයක් ලෙස දකින්න්නො එක් දිනකදි සියල්ලෝම දෙවියන් ලෙස දකිමින් කුලමල භේදයකින් තොරව සංවාසයේ යෙදීම හුදෙක් සිය ප්‍රාර්ථනාවන් මුදුන් පමුණුවා ගැනීම සහ ඉන් ඇති වෙනෙ guilty feeling එක නැති කර ගැනීමටනිර්මාණය කරගත් ව්‍යාජ ,තුප්පහි, මිත්‍යාදෘෂ්ඨික චාරිත්‍රයකි. කතා නායක 'කාලි' මෙය දනී.. එක් දිනකට පමණක් කුල මල භේදයකින් තොරව සියල්ලොම දෙවියන් වේ නම් අන් දිනවල එසේ නොවන්නේ ඇයි?! 

තවද දකුණු ආසියාතික පුරුෂ මූලික සමාජයන් හි දරුඵල නොමැති වීම බොහෝ විට බැර වන්නේ කාන්තාවට ය.
'වද එකී' එවන් අය ලබන නාමපදයයි. බොහෝ විට පිරිමි පාර්ශවයෙන් කිවෙනුයේ ' අපේ පරම්පරාවල් වල වද එවුන් නෑ.පැදුර පෑගුවත් ඇති ' ලෙසය .කලකට ඉහතදී නැරඹූ 'පාර්ච්ඩ්' හින්දි සිනමාපටයේ දේ මේ ගැන කියවෙන සිද්ධීන් අඩංගුය.
ඉහත කී මිත්‍යාදෘෂ්ඨික චාරිත්‍රයද පුරුෂමූලික ඉන්දියාවේ පුරුෂයාගේ අඩුලුහුඬුකම් වසා ගැනීමට පුරුෂයන් විසින්ම නිර්මාණය කිරීමට යෙදුනක් යැයි මට සිතේ. දරුඵල නොමැති ගැමියන් වෛද්‍ය පරීක්ෂණ වලට යොමූ වී මද සරු කවුරුන්ද යන්න තෝරා බේරා ගැනීම ඉන්දිය සමාජයේ විරලය.ඊට හේතුවද ඉන් පුරුෂයන්ට විය හැකි ලැජ්ජාව වසා ගැනීමයි. එවන් තත්වයකදි හදිසියේවත් "මට බැරි වෙලා ඈට පුලුවන් නම් ඈ වෙනකෙක් එක්ක නිදාගෙන හෝ ළමයෙක් හදාගතහොත් කිසිවෙක් නොදන්නා තාක් කල් ඒ ළමයා මගේ ලෙස සළකනු ඇත" යන්න පදනම් කරගෙන නිමවුණු චාරිත්‍රයකි එය.
එවන් මිත්‍යාදෘෂ්ඨික චාරිත්‍ර බොහෝ ප්‍රමාණයක් මෙහි කියවේ. මාධොරුභාගන් තහනම් කිරීමට මධුරාසි මහාධිකරණයේ නඩු පැවරෙන්නේ මෙවන් තුප්පහි චාරිත්‍ර වලට පහර වැදී ඇති බැවිනි. කෙසේ හෝ පෙරුමාල් නඩුව දින්නේය. මෙය පෙරුමාල් ගේ විශිෂ්ඨතම නවකතාව ලෙසද හැදින්වේ.

ලීමට දෑ බොහෝ වුවත් ලිපිය දිග්ගැස්සීමට තවත් නොසිතමි.එසේ වුවහොත් ඇතැම් ප්‍රවීණයන්ගේ?! පරිවර්තන කාර්‍යයන් මෙන්ම මගේ ලිපියද නීරස වනු නොඅණුමානය.

ප්‍රකාශනය - ආශිර්වාද
මුල් කෘතිය - මාධොරුභාගන්
ඉංග්‍රීසි කෘතිය - One part woman
සිංහල පරිවර්තනය - අර්ධනාරි
මිල - 450/-
පිටු - 223
මගේ ඇගයීම - 8/10