භාරතයේ විත්ති - 34 - "Forest Man"

එක එක ජාතියේ මෑන්ලා ඉන්දියාවෙ ඉන්නවා... ඔය අතරින් , කන්දක් උඩින් වතුර රැගෙන එද්දී පය ලිස්සා මිය ගිය සිය බිරිදත්, ඈව ගෙනයාමට පාරක් නොමැති කම නිසා කන්දක් වටේ ගොස් රෝහලට යන විට ඈ මිය ගොස් සිටි නිසා ගමට පාරක් ලබා ගතයුතු යැයි සිතා නොඑක් දෝෂාරෝපණ , උපහාස මධ්‍යයේ අවුරුදු ගාණක් මහන්සි වී එම  කන්ද මැදින් කපා පාරක් තැනු 'මවුන්ටන් මෑන්' (දෂ්රත් මන්ජී ) සහ මාස්ශුදධියේදී සිය බිරිද අපිරිසිදු රෙදිකඩවල් භාවිතා කරන නිසා එය නැවතීමට විවිධ අපහාස, උපහාස මධ්‍යයේ පරීක්ෂණ සිදුකර අඩු මිල සැනිටරි පෑඩ් නිපදවන යන්ත්‍රයක් සොයාගෙන එමගින් නිපදවූ සැනිටරි පෑඩ්ස් රුපියල් දෙකක් වැනි වූ අඩු මිලකට කාන්තාවන්ට ලබා දීමට කටයුතු කල 'පැඩ් මෑන්'( අරුණාචලම් මුරුගනාතන්) කියන දෙන්නා වඩාත් ප්‍රසිද්ධ වන්නෙ 'Manjhi :The mountain man' සහ 'Pad man' කියන සිනමාපට නිසා...
මම මේ කියන්න යන්නෙ ඉන්දියාවේ ප්‍රසිද්ධ ෆොරස්ට් මෑන් ගැන... එයා ගැන තාම සිනමාපටයක් හැදිලා නැති නිසා දන්න කට්ටිය අඩුයි...

එහෙනම් අපි බලමු කවුද මේ ෆොරස්ට් මෑන්

1979 දී වයස 16ක් වෙච්ච ජාදව් පයෙං දවසක් දකිනවා බ්‍රහ්මපුත්‍ර ගංගාවේ දූපතක් වෙච්ච 'මාජුලි' හි (මාජුලී දිවයින :ඇසෑම් ප්‍රාන්තයේ,  ලොව විශාලම ගංගා දූපත ලෙස ගිනස් පොතට ඇතුළු වුන, 2016 සැප්තැම්බර් 8 දින වෙනම දිස්ත්‍රික්කයක් ලෙස ප්‍රකාශ කරන ලද )   මියගොස් සිටි සර්පයන් විශාල සක්ඛ්‍යාවක්.. මොවුන් ගංවතුරට ගසාගෙන විත් දූපතට ගොඩ වුණත්, එහි තිබුණු අධික රස්නය නිසාම මිය ගොස් වේලී ගොස් තිබුණා.. ඔහු කියන අන්දමට මේ අවස්ථාවේ ඔහුට හිතිලා තියෙනවා මිනිස්සුන්ටත් කවදා හරි මේ විදිහට වේළිලා කර වෙලා යන්න වෙයි කියලා, අධික රස්නය නිසාම.. එදා තමයි ඔහු තීරණය කරන්නෙ මාජුලි දිවයිනේ වන වගාවක් ආරම්භ කරන්න..

ඔහු උණ ගස් සහ කපු ගස් සිටුවීමෙන් පොඩියට පටං ගත් වන වගාව  අවුරුදු හතලිහකට පසුව අද වන විට හෙක්ටාර 550 විශාල (පාපන්දු ක්‍රීඩාංගණ 15ක වපසරියට සමාන) 'මොලායි වන් රක්ෂිතය' බවට පත්ව තිබෙණවා...එහි කොහොඹ, කුඹුක් (අර්ජුනා/terminalia arjuna) ,මුරුත (pride of India /largerstroemia speciosa),මැයි (royal poinciana/delonix regia), ඇල්බීසියා (silk trees/albizia procera), කලටිය (moj/archidendron bigeminum) , කපු, උණ සහ තවත් නම් වශයෙන් සදහන් කල නොහැකි විශාල ශාඛ ගහණයක් වෙනවා... ජාදව්ගේ දෑතින් බිහි වුණ මෙම වනය එක්සත් ජනපදයේ නිව් යෝක් සිටිහි පිහිටි සෙන්ට්‍රල් පාක් වනෝද්‍යානයටද වඩා ප්‍රමාණයෙන් විශාලයි...

මේ වන විට ශාඛ වර්ග විශාල ප්‍රමාණයක් මෙම වනයේ තිබෙනවා...ඒ විතරක් නම් මදැයි මේ වෙනකොට මිනිසෙක් අතින් නිමවුන මේ වනාන්තරයේ අලි,ඉන්දියානු රයිනෝ, මුවන්,හාවන්,වදුරන්,වල් ඌරන්, ගිජු ලිහිණින්, පක්ෂීණ් විශේෂ සිය ගැනනක්,විවිධ වර්ග වල උරගයන් රාශියක් විතරක් නෙවේ අතිෂය දුර්ලභ බෙංගාලි කොටි පවා ජීවත් වෙනවා...

ජාදව් කුඩා කාලයේ මාජූලී දිවයින එක් පසෙකින් ප්‍රධාන භූමියට සම්බන්ධව තිබුණත් කාලයක් තිස්සේ සිදු වුන පාංශුඛාදනය නිසා එම කොටස කැඩී ගොස් එය දූපතක් බවට පත්ව තිබුණා සහ දිගින් දිගටම පාංශුඛාදනය වෙමින් තිබුණා..ජාදව් ගේ වන වගා ව්‍යාපෘතිය නිසාම මෙම පාංශු ඛාදනය නැවතුනා...
මෙසේ වසර ගණනාවක් ඔහු වන වගාව මගින් සමාජයට අති මහත් සේවයක් කලත් රජය ඔහු ගැන දැන ගන්නේ 2008 වසරේදීය , ඒ අලි සිය ගණනින් මෙම වනයට පැමිණි බවට පුවතක් පලවීමත් සමගයි.. (එතෙක් ප්‍රාදේශීය දේශපාලුවන් හෝ මේ ගැන අවධානය යොමු නොකලේ යැයි අප සිතමු) එතැන් සිට් ජාදව්ගේ මෙම වචනයේ පරිසමාප්ති අර්ථයෙන්ම සද්ක්‍රියාව ඉදියාවේ නොමද පැසසුමට ලක්වුනා .. සංචාරකයන් මෙම වනය නැරඹීමට පැමිණෙන්න ගත්තා.. විශේෂ කාරණයක් නම් මෙම වනය තුළදී අලි පැටවුන් 10 දෙනෙක් උපත ලබා තිබෙනවා...

2012 දී මොහු ගැන වාර්තාමය සිනමාපටයක් ජිතු කලිටා විසින් නිපදවෙන අතර එය සම්මාන කිහිපයක්ද දිනා ගන්න සමත් වෙනවා...2013 දී ආර්තී ශ්‍රීවාස්ථව විසින් නිපදවුන "Foresting life" වාර්තා සිනමාපටයේද මොලායි වන උයන ගැන සදහන් වෙනවා...

ලොව විශාලතම :මිනිසුන් අතින් බිහිවුණ වනය තිබෙන්නේ චීනයේය..එය කාලයත් සමග  චීනයෙ භූමි ප්‍රමාණයෙන් 42%ක් පමණ වන තෙක් ව්‍යාප්ත වන්නේ මිනිසුන් විශාල ප්‍රමාණයක් විසින් වරින් වර පැල සිටුවීම් සිදු කල බැවිනි.. එහෙත් මොලායි වනය යනු තනිකර ජාදව්ගේ උත්සාහයෙන් බිහිවුණ වනාන්තරයක්...
එහෙත් ඔහු පවසන්නේ එහි ඇගයුම තමුන්ට තනිව ගත නොහැකි බවයි.. ඔහු පවසන්නේ.." ඔබ ගසක් දෙකක් පැල කරන්න..ඔවුන් නිසි වයසට පැමිණි විට ඵල දරාවී, ඵල ඔබට බීජ දේවි, සුළග දන්නවා  බීජ රැගෙන යායුතු තැන්...කුරුල්ලන් දන්නවා බීජ පැල කල යුතු තැන්... හරක්,අලි කොටින්ම කියතොත් බ්‍රහ්මපුත්‍ර ගංගාව දන්නවා බීජ ගෙන ගොස් පැල කලයුතු තැන්.. මුලි මහත් පරිසර පද්ධතියම එය දන්නවා.. ඔවුන් සියලු දෙනාටම මෙහි ඇගයීම හිමි විය යුතුයි..."

නැවත හමු වෙමු

- අමිල-

Gallery